ශ්‍රී ලංකාවේ ප්‍රංශ තානාපති කාර්යාලය විසින් සංවිධානය කරන ලද සාකච්ඡාවක් ඊයේ (ජුනි 23) ප්‍රංශයේදී පැවැත්විණි.
මෙම වැදගත් හමුවට ධීවර, ජලජ හා සාගර සම්පත් අමාත්‍යාංශයේ ලේකම් ආචාර්ය බී. කේ. කෝලිත කමල් ජිනදාස මහතා, ජාතික ජලජ සම්පත් පර්යේෂණ හා සංවර්ධන නියෝජිතායතනයේ (NARA) අධ්‍යක්ෂ ජනරාල් ආචාර්ය කනපතිපිල්ලේ අරුලනන්දන් මහතා සහ ශ්‍රී ලංකා වෙරළ ආරක්ෂක දෙපාර්තමේන්තුවේ අධ්‍යක්ෂ ජනරාල් රියර් අද්මිරාල් සේරසිංහ යාපා රාජප්‍රිය මහතා සහභාගී වූහ.
මෙහිදී, යුරෝපීය සාගර පුහුණු මධ්‍යස්ථානයේ (CEFCM) අධ්‍යක්ෂ ඇලන් පොමේස් මහතා, නියෝජ්‍ය අධ්‍යක්ෂ සහ සාගර විද්‍යාව හා සාගර ආර්ථික විද්‍යාව පිළිබඳ විශේෂඥ වෛද්‍ය මුස්තාෆා එල් කෙට්ටබ් මහතා, සහ සංවර්ධන නිලධාරී ක්‍රිස්ටෝෆ් හර්වේ මහතා (ප්‍රංශ ජාතික හමුදාවේ සහ නාවික හමුදාවේ හිටපු ජ්‍යෙෂ්ඨ නිලධාරියෙකු මෙන්ම සාගර ආරක්ෂක විශේෂඥයෙකු) සමඟ නීතිවිරෝධී ධීවර කටයුතු මැඩලීම සහ ශ්‍රී ලංකාවේ නිල් ආර්ථිකය සංවර්ධනය කිරීම සඳහා සහයෝගී ව්‍යාපෘති පිළිබඳව සාරවත් සාකච්ඡාවක් පැවැත්විණි.
තවද, අමාත්‍යාංශ ලේකම්වරයා විසින් පහත සඳහන් ප්‍රධාන ක්ෂේත්‍ර කිහිපයක් ඔස්සේ පුහුණු සැලැස්මක් ආරම්භ කරන ලෙස ඉල්ලීමක් කරන ලදී:
ජලජීවී වගාව: SPF Penaeus monodon (කූනිස්සන්) අභිජනනය, බෙල්ලන් වගාව, ඇල්ගී වගාව, වර්ණවත් මසුන් අභිජනනය, සහ මුහුදු ඉකිරි වැනි Echinodermata ජීවීන් වගා කිරීම.
මත්ස්‍ය කර්මාන්තය: මිරිදිය හා කරදිය මත්ස්‍ය කර්මාන්තය සහ ඊට අදාළ නවීන ශිල්පීය ක්‍රම.
ජෛව තාක්ෂණය: ජෛව තාක්ෂණය සහ ඊට අදාළ නිෂ්පාදන සංවර්ධනය.
ආහාර සැකසුම්: ධීවර කර්මාන්තය හා සම්බන්ධ ආහාර සැකසුම් තාක්ෂණය.
මානව සම්පත්: ධීවර යාත්‍රා කාර්මිකයන් පුහුණු කිරීම.
අලෙවිකරණය සහ සහතිකකරණය: ධීවර අලෙවිකරණය සහ MSC වැනි ජාත්‍යන්තර සහතිකකරණයන් ලබාගැනීම.
ඊට ප්‍රතිචාර වශයෙන්, CEFCM නියෝජිතයින් ශ්‍රී ලංකාවේ අවශ්‍යතා අධ්‍යයනය කර, ඒ අනුව පුහුණු වැඩසටහන් සහ විෂය නිර්දේශ සකස් කර ඉදිරියේදී ක්‍රියාත්මක කිරීමට එකඟතාව පළ කළහ. මෙම සහයෝගීතාව මෙරට ධීවර හා ජලජ සම්පත් ක්ෂේත්‍රයේ තිරසාර සංවර්ධනයට විශාල පිටිවහලක් වනු ඇතැයි අපේක්ෂා කෙරේ.
