ගාල්ල, රත්ගම මුහුදු තීරයේදී අතුරුදන් වූ ධීවරයින් පස් දෙනාම නිරුපද්රිතව මුදා ගැනීමේ මෙහෙයුම සාර්ථක වූ බව, ධීවර, ජලජ හා සාගර සම්පත් නියෝජ්ය අමාත්ය, ගරු රත්න ගමගේ මහතා අද (28) දින තහවුරු කළේය.
නොවැම්බර් 26 වන දින රත්ගම වැල්ල ධීවර තොටුපළෙන් මුහුදු ගිය යාත්රා හතකින්, යාත්රා දෙකක් නැවත ගොඩබිමට නොපැමිණීමත් සමඟ මෙම මෙහෙයුම ආරම්භ විය. නියෝජ්ය අමාත්යවරයාගේ ඉල්ලීම පරිදි, ශ්රී ලංකා නාවික හමුදාව ඩෝරා යාත්රාවක් ද, ගුවන් හමුදාව හෙලිකොප්ටර් යානයක් ද යොදවමින් සෝදිසි මෙහෙයුම් දියත් කරන ලදී. මෙම සෝදිසි මෙහෙයුම් ක්රියාත්මක වෙමින් පැවති අතරතුර, ඊයේ (27) රාත්රියේ එක් යාත්රාවක සිටි ධීවරයින් තිදෙනෙකු, එම මුහුදු තීරයේ ධීවර කටයුතුවල නිරතව සිටි බහුදින ධීවර යාත්රාවක් මගින් බේරා ගන්නා ලදී. අනතුරුව අද උදෑසන, දෙවන යාත්රාවේ සිටි අනෙක් ධීවරයින් දෙදෙනා ද තවත් බහුදින යාත්රාවක් මගින් නිරුපද්රිතව මුදාගෙන ඇති බව තහවුරු විය.
මෙම සාර්ථක මෙහෙයුම පිළිබඳව අදහස් දක්වමින් නියෝජ්ය අමාත්ය ගමගේ මහතා මෙසේ පැවසීය: "මේ ධීවර ජීවිත පහම බේරා ගැනීමට හැකිවීම ගැන අපි අතිශයින් සතුටු වෙනවා. ඔවුන්ගේ ආරක්ෂාව අපේ ප්රමුඛතම වගකීමයි. මෙම මෙහෙයුමට සහය දුන් ශ්රී ලංකා නාවික හමුදාවට, ගුවන් හමුදාවට, විශේෂයෙන්ම දිවි පරදුවට තබා තම සහෝදර ධීවරයින් බේරාගත් බහුදින යාත්රාවල කාර්ය මණ්ඩලවලට මගේ හෘදයාංගම ස්තූතිය පුද කරනවා."
ඒ මහතා සමස්ත ධීවර ප්රජාව වෙත දැඩි අවවාදයක් සමඟින් විශේෂ ඉල්ලීමක් ද කළේය:
"රට පුරා සිටින සමස්ත ධීවර ප්රජාවගෙන් මම වගකීමෙන් සහ ඉතා ඕනෑකමින් ඉල්ලා සිටිනවා: කරුණාකර, මෙම අයහපත් කාලගුණ තත්ත්වය පහව ගොස්, ධීවර හා ජලජ සම්පත් දෙපාර්තමේන්තුවෙන් හෝ කාලගුණ විද්යා දෙපාර්තමේන්තුවෙන් නිල වශයෙන් දැනුම් දෙන තුරු මුහුදු යාමෙන් වළකින්න. ඕනෑම අස්වැන්නකට වඩා ඔබගේ ජීවිත අපට වටිනවා. අපේ ආරක්ෂක අංශ, රට අභ්යන්තරයේ ගංවතුර සහ නායයෑම් වැනි ආපදාවලට මුහුණ දීමට දැඩි වෙහෙසක් දරන මොහොතක, සමුද්රීය මුදාගැනීමේ මෙහෙයුම් ප්රමාද විය හැකියි. කරුණාකර, ඔබගේ යාත්රා සුරක්ෂිත ස්ථානවල නවතා, හැකි නම්, ගංවතුරෙන් පීඩාවට පත් අපේම සහෝදර ජනතාවට උදව් කිරීමට ඔබගේ බෝට්ටු යොදා ගන්න."
නියෝජ්ය අමාත්යවරයා මෙම තත්ත්වය පිළිබඳව දිගටම නිරීක්ෂණය කරමින්, මුදාගත් ධීවරයින්ට අවශ්ය පහසුකම් සැලසීමට සහ ඔවුන්ගේ පවුල්වල සාමාජිකයින් දැනුවත් කිරීමට කටයුතු කරමින් සිටී.
