නත්තල් උත්සවය යනු ආදරය, සාමය, කරුණාව සහ විශ්වාසය පිළිබඳ විශ්වීය පණිවිඩය සමඟින් මානව වර්ගයාගේ හදවත් එකට යා කරන අති උතුම් දිනයක් බව ධීවර, ජලජ සහ සාගර සම්පත් අමාත්ය රාමලිංගම් චන්ද්රසේකර් මහතා සිය නත්තල් දින සුබපැතුම් පණිවිඩය මගින් ප්රකාශ කරයි.
ජේසුස් ක්රිස්තුන් වහන්සේගේ උපත මානව සමාජයට ආදරය, පරිත්යාගය, සමාව දීම සහ සමගිය වැනි උතුම් ගුණාංග මැනවින් පසක් කර දුන් බව අමාත්යවරයා සඳහන් කළේය. එම දිව්යමය උපත මිනිසුන්ට එකිනෙකාට ආදරයෙන් ජීවත් වීමටත්, වෙනස්කම්වලට ගරු කරමින් සාමකාමීව එක්ව කටයුතු කිරීමටත් මග පෙන්වන සදාකාලික ආලෝකයක් බවද ඔහු වැඩිදුරටත් පැවසීය.
මෙම සුවිශේෂී උත්සවය නිමිත්තෙන් ශ්රී ලාංකික ජනතාවටත්, විශේෂයෙන්ම කිතුනු සහෝදර සහෝදරියන්ටත් සිය හෘදයාංගම නත්තල් සුබපැතුම් පිරිනැමූ අමාත්යවරයා, නත්තල් උත්සවය සෑම පවුලක් තුළම සාමය, සතුට සහ බලාපොරොත්තුව ඇති කිරීමට හේතු විය යුතු බව සඳහන් කළේය.
එසේම, වත්මන් සමාජ හා ආර්ථික අභියෝග මධ්යයේ නත්තලින් කියාපාන මානුෂීය වටිනාකම් අත්යවශ්ය බව අමාත්යවරයා පෙන්වා දුන්නේය. අන්යෝන්ය අවබෝධය, සහෝදරත්වය සහ සමාජ වගකීම ශක්තිමත් වීමෙන් පමණක් ස්ථාවර ජාතික ප්රගතියක් අත්කර ගත හැකි බවද ඔහු අවධාරණය කළේය.
ජාති, ආගම්, භාෂා භේදයකින් තොරව සියලුම ශ්රී ලාංකිකයන් එකම දැයක් ලෙස එක්ව කටයුතු කිරීම නත්තල් උත්සවය ලබා දෙන ප්රධාන පණිවිඩය බව සඳහන් කළ අමාත්යවරයා, එම සමගිය රටේ සාමය, සංවර්ධනය සහ අනාගත සෞභාග්යයේ පදනම වන බවද පැවසීය.
මෙම නත්තල් උත්සවය නව බලාපොරොත්තු සහ නව උද්යෝගයකින් යුතුව සැවොම එක්සත් කර සමාජය තුළ මානුෂීයත්වය සහ කරුණාව මුල් බැස ගැනීමට උපකාරී විය යුතු බවට සුබපැතුම් එක් කළ අමාත්යවරයා, සමගිය, සාමය සහ අන්යෝන්ය ගෞරවය යන වටිනාකම් සමඟින් නව වසරට මුහුණ දීමට සැමට ඇරයුම් කළේය.
