ධීවර, ජලජ හා සාගර සම්පත් නියෝජ්‍ය අමාත්‍ය, රත්න ගමගේ මහතා සහ ශ්‍රී ලංකාවේ මාලදිවයින් ජනරජයේ මහ කොමසාරිස්, මසූද් ඉමාද් (H.E Masood Imad) මැතිතුමා අතර සුහද හමුවක් ඊයේ (අගෝස්තු 8) දින ධීවර අමාත්‍යාංශයේදී පැවැත්විණි.
දෙරට අතර ධීවර ක්ෂේත්‍රයේ සහයෝගීතාව ශක්තිමත් කිරීම මෙම හමුවේ ප්‍රධාන අරමුණ විය.
මෙම අවස්ථාව සඳහා ධීවර, ජලජ හා සාගර සම්පත් අමාත්‍යාංශයේ ලේකම් ආචාර්ය බී. කේ. කෝලිත කමල් ජිනදාස මහතා සහ නියෝජ්‍ය අමාත්‍යතුමාගේ පෞද්ගලික ලේකම් එච්.එස්. හතුරුසිංහ මහතා ද එක්ව සිටියහ.
ඉන්දීය සාගරයේ අසල්වැසි දූපත් රාජ්‍යයන් දෙකක් ලෙස ශ්‍රී ලංකාව සහ මාලදිවයින අතර දිගුකාලීනව පවතින මිත්‍රත්වය සිහිපත් කළ නියෝජ්‍ය අමාත්‍යවරයා සහ මහ කොමසාරිස්වරයා, ධීවර ක්ෂේත්‍රයේ අන්‍යෝන්‍ය වශයෙන් ප්‍රතිලාභ අත්වන කරුණු කිහිපයක් පිළිබඳව මෙහිදී සාකච්ඡා කළහ.
* තිරසාර ධීවර කළමනාකරණය: ඉන්දීය සාගරයේ දෙරටටම පොදු වූ මත්ස්‍ය සම්පත, විශේෂයෙන්ම ටූනා වැනි සම්පත් තිරසාර ලෙස කළමනාකරණය කිරීම සහ එම දත්ත හුවමාරු කර ගැනීමේ වැදගත්කම පිළිබඳව දෙපාර්ශ්වයම එකඟතාව පළ කළහ.
* වෙළෙඳ සහ ආයෝජන අවස්ථා: ශ්‍රී ලංකාව සහ මාලදිවයින අතර ධීවර නිෂ්පාදන වෙළෙඳාම පුළුල් කිරීම සහ ශ්‍රී ලාංකික ආයෝජකයින් සඳහා මාලදිවයිනේ ධීවර ක්ෂේත්‍රයේ ඇති අවස්ථා පිළිබඳව ද මෙහිදී අදහස් හුවමාරු කර ගන්නා ලදී.
දෙරටේ ධීවර කර්මාන්තයේ උන්නතිය උදෙසා ඉදිරියේදීත් සමීපව කටයුතු කිරීමට දෙපාර්ශ්වයම මෙහිදී එකඟතාව පළ කළ අතර, මෙම හමුව ඉතා සුහදශීලීව නිමාවට පත් විය.
