ශ්රී ලංකාවේ ධීවර අපනයන ක්ෂේත්රය වැඩිදියුණු කිරීම සඳහා වන සහයෝගීතාව පිළිබඳව සාකච්ඡා කිරීම සඳහා, චීනයේ ෂෙන්සෙන් නගරය නියෝජනය කරමින් විශේෂ නියෝජිත පිරිසක්, ධීවර, ජලජ හා සාගර සම්පත් නියෝජ්ය අමාත්ය, ගරු රත්න ගමගේ මහතා සමඟ දෙසැම්බර් 02 වන දින සාකච්ඡාවක නිරත විය.
මෙරට ප්රමුඛ පෙළේ අපනයන සමාගමක් වන 'ට්රොපික් ෆ්රෝසන්' (Tropic Frozen) සමඟ එක්ව පැමිණි මෙම නියෝජිත පිරිස, ඇමරිකාව වැනි ඉහළ ඉල්ලුමක් ඇති වෙළෙඳපොළ සඳහා, අගය එකතු කළ මත්ස්ය අපනයනය නිෂ්පාදන දියුණු කිරීම කෙරෙහි දැඩි උනන්දුවක් දැක්වීය.
මෙම හමුවේදී, ශ්රී ලංකාවේ මෑතකදී ඇති වූ ගංවතුර ආපදා තත්ත්වය පිළිබඳව සිය කණගාටුව පළ කළ චීන නියෝජිතයෝ, රට යළි ගොඩනැගීමේ ප්රයත්නය සඳහා සිය පූර්ණ සහයෝගය ලබා දෙන බවට පොරොන්දු වූහ. විශේෂයෙන්ම, ධීවර අපනයන කර්මාන්තය නංවාලීම සඳහා, උසස් අගය එකතු කිරීමේ තාක්ෂණය හඳුන්වා දෙමින්, සමීපව සහයෝගයෙන් කටයුතු කිරීමට ඔවුහු මෙහිදී කැමැත්ත පළ කළහ.
නියෝජිත පිරිස ඉතා උණුසුම් ලෙස පිළිගත් නියෝජ්ය අමාත්ය රත්න ගමගේ මහතා, මෙවැනි හවුල්කාරීත්වයක ඇති වැදගත්කම අවධාරණය කළේය.
"ෂෙන්සෙන් නියෝජිත පිරිස විසින් ඉදිරිපත් කළ මෙම යෝජනාව පිළිබඳව අපි ඉතා සතුටු වෙනවා. අපේ ධීවර අපනයන කර්මාන්තය ඉහළ තලයකට ගෙන යාමට නම්, විශේෂයෙන්ම මත්ස්ය අභිජනනය, ජලජීවී වගාව සහ අගය එකතු කිරීම වැනි ප්රධාන ක්ෂේත්ර සඳහා නවීන තාක්ෂණය අත්යවශ්යයි," යැයි නියෝජ්ය අමාත්යවරයා ප්රකාශ කළේය. " අපගේ අපනයන නිෂ්පාදන වැඩිදියුණු කිරීමට අවශ්ය තාක්ෂණික දැනුම ලබා දීමට ඔවුන් දක්වන කැපවීම අපි බෙහෙවින් අගය කරනවා. එමගින්, අපට ඉහළ විදේශ විනිමයක් උපයා ගැනීමට හැකි වනු ඇත. මෙම සහයෝගීතාව, අපගේ නිෂ්පාදන ආර්ථිකය ශක්තිමත් කිරීමේ ගමනේ ඉතා වැදගත් පියවරක්."
දෙපාර්ශ්වය අතර පැවති මෙම සාකච්ඡාව ඉතා සුහදශීලීව නිමාවට පත් වූ අතර, ධීවර ක්ෂේත්රයේ අනාගත සහයෝගීතාව සඳහා ශක්තිමත් පදනමක් ස්ථාපිත කෙරිණි. යෝජිත මුලපිරීම් ඔස්සේ ඉදිරියේදී සමීපව කටයුතු කිරීමට දෙපාර්ශ්වයම මෙහිදී එකඟතාව පළ කළහ.
