‘திட்வா' (Ditwa) சூறாவளியினால் வாழ்வாதார ரீதியாகப் பாதிக்கப்பட்ட புத்தளம் மாவட்டத்தின் 331 சிறு அளவிலான இறால் பண்ணையாளர்கள், மீண்டும் தமது உற்பத்தி நடவடிக்கைகளை ஆரம்பிக்கும் பொருட்டு 135.7 மில்லியன் ரூபா நிதியுதவி வழங்கும் நிகழ்வு, கடற்றொழில், நீரியல் மற்றும் கடல் வளங்கள் அமைச்சர் இராமலிங்கம் சந்திரசேகர் தலைமையில் இன்று (29) சிலாபம் ‘சுதசுன’ மண்டபத்தில் நடைபெற்றது.

இந்த நிவாரணத் திட்டத்தின் கீழ், அனர்த்தத்தின் போது பண்ணைகளில் இறால் குஞ்சுகளை விடுவித்திருந்தவர்களுக்கு தலா 450,000 ரூபா வீதமும், இறால் குஞ்சுகள் இருப்பு வைக்காத போதிலும் பண்ணை உட்கட்டமைப்புகள் (Structures) பாதிக்கப்பட்டவர்களுக்கு தலா 250,000 ரூபா வீதமும் காசோலைகள் வழங்கி வைக்கப்பட்டன.

இங்கு உரையாற்றிய அமைச்சர் இராமலிங்கம் சந்திரசேகர் அவர்கள் குறிப்பிட்டதாவது:
"இன்றைய நாள் மிகவும் மகிழ்ச்சியான ஒரு நாளாகும். இயற்கை அனர்த்தங்கள் மற்றும் பல்வேறு சவால்களுக்கு மத்தியில் வீழ்ச்சியடைந்த சிறு அளவிலான இறால் பண்ணையாளர்கள் மீண்டும் எழுந்து நிற்பதற்கான நம்பிக்கையையே நாம் இதன் மூலம் வழங்குகிறோம். பண்ணையாளர்கள் புதிய பருவத்திற்கான உற்பத்திகளை ஆரம்பித்துள்ள போதிலும், தீவனம் (Feed) போன்ற அத்தியாவசிய தேவைகளுக்கான நிதி நெருக்கடியை எதிர்கொள்வதை நாம் உணர்ந்துள்ளோம். எனவே, பண்ணையாளர் சங்கங்களின் (SLADA) ஆலோசனைகளைப் பெற்று, எவ்வித பாரபட்சமுமின்றி இந்த உதவிகளை வழங்குகிறோம். பண்ணையாளர்கள் வீழ்ந்த இடத்திலிருந்து மீண்டும் எழுந்து, நவீன தொழில்நுட்பத்தின் ஊடாக இத்துறையை உலகத் தரத்திற்கு உயர்த்துவதே எமது இலக்காகும்."

இந்நிகழ்வில் உரையாற்றிய புத்தளம் மாவட்ட நாடாளுமன்ற உறுப்பினர் அஜித் கிஹான், இறால் வளர்ப்புத் துறையை வலுப்படுத்த அரசாங்கம் 1800 மில்லியன் ரூபா நிதியை ஒதுக்கியுள்ளதாகத் தெரிவித்தார். உற்பத்தியாளர்கள், குஞ்சு உற்பத்தி நிலையங்கள் மற்றும் ஏற்றுமதியாளர்களை ஒன்றிணைத்த ஒரு முறையான வேலைத்திட்டத்தின் மூலம் நாட்டுக்கு அதிக அந்நியச் செலாவணியை ஈட்டித் தருவதே தமது நோக்கம் என அவர் மேலும் குறிப்பிட்டார்.

இந்நிகழ்வில் தேசிய நீர்வாழ் உயிரின வளர்ப்பு அபிவிருத்தி அதிகார சபையின் (NAQDA) தலைவர் கித்சிறி தர்மப்பிரிய, புத்தளம் மேலதிக மாவட்டச் செயலாளர், இலங்கை இறால் பண்ணையாளர் சங்கத்தின் (SLADA/SRADA) பிரதிநிதிகள் மற்றும் வடமேல் மாகாண சபை அதிகாரிகள் உள்ளிட்ட பலரும் கலந்துகொண்டனர்.